«Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىنىڭ القا وتىرىسىنا قاتىستى.

باۋىرجان بايبەك ەلباسى، «Nur Otan» پارتياسىنىڭ ليدەرى نۇرسۇلتان نازاربايەۆتىڭ پارتيا ورگاندارىنىڭ الدىنا سىبايلاس جەمقورلىققا قارسى جۇمىس فورماتى مەن تاسىلدەرىن جەتىلدىرۋ بويىنشا ناقتى مىندەتتەر قويىلعانىن اتاپ ءوتتى.

– پارتيا جانىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەس سىبايلاس جەمقورلىققا قارسى وزەكتى ماسەلەلەر وتكىر تالقىلانىپ، وسى باعىتتا زاڭنامانى جەتىلدىرۋ بويىنشا ناقتى ۇسىنىستار ەنگىزىلەتىن بەلسەندى الاڭعا اينالدى. 2019 جىلدىڭ 2ء-شى جارتىجىلدىعىندا ورتالىق جانە ايماقتىق دەڭگەيدە سىبايلاس جەمقورلىققا قارسى ءىس-قيمىل جونىندەگى قوعامدىق كەڭەستەردىڭ وتىرىستارى وتكىزىلىپ،  ءبىلىم بەرۋ سالاسىنداعى سىبايلاس جەمقورلىققا قارسى ءىس-قيمىل، «ەڭبەك» مەملەكەتتىك باعدارلاماسىن ىسكە اسىرۋ، حالىقتى ساپالى اۋىز سۋمەن قامتاماسىز ەتۋ سۇراقتارى، سونىمەن بىرگە ايماقتىق كەڭەستەردىڭ  جۇمىسى قارالدى، – دەدى باۋىرجان بايبەك.

پارتيا ءتوراعاسى ءبىرىنشى ورىنباسارىنىڭ ايتۋىنشا، وسى كەزگە دەيىن قۇقىقبۇزۋشىلىقتارعا جول بەرگەنى ءۇشىن پارتيانىڭ 196 مۇشەسى، اتاپ ايتقاندا، اقتوبە، شىعىس قازاقستان جانە قىزىلوردا وبلىستارى اكىمدەرىنىڭ ورىنباسارلارى، وبلىستىق باسقارمالار مەن اۋدان اكىمدىكتەرىنىڭ باسشىلارى پارتيالىق جاۋاپكەرشىلىككە تارتىلعان. 2019 جىلدىڭ 2ء-شى جارتىجىلدىعىندا عانا 96 پارتيا مۇشەسى سىبايلاس جەمقورلىق قۇقىق بۇزۋشىلىقتارىن جاساعانى ءۇشىن پارتيا قاتارىنان شىعارىلعان.

بۇگىندە 80%-دان استام مەملەكەتتىك قىزمەت اۆتوماتتاندىرىلعان، ەلىمىزدىڭ بارلىق ايماقتارىندا حالىققا قىزمەت كورسەتۋ ورتالىقتارى جۇمىس ىستەيدى، سيفرلىق تەحنولوگيالار ەنگىزىلۋدە، ءبىر تەرەزە ءپرينسيپى بويىنشا قۇقىق قورعاۋ قىزمەتتەرىنىڭ ورتالىقتارى اشىلۋدا.

قوعامنىڭ سىبايلاس جەمقورلىققا قارسى ساناسىن قالىپتاستىرۋ ماقساتىندا، ەلىمىزدە «Nur Otan» پارتياسى سىبايلاس جەمقورلىقتى ءتۇيسىنۋدىڭ ۇلتتىق يندەكسىن ەنگىزگەن.

سونداي-اق، سىبايلاس جەمقورلىققا قارسى ءىس-قيمىل جونىندەگى كەڭەس مۇشەلەرىنە الەۋمەتتىك جەلىلەردە بەلسەندىلىك تانىتۋ، ءوز جۇمىسىن جۇيەلى تۇردە جاريالاۋ مىندەتى قويىلدى. بۇل حالىقپەن ءتيىمدى كەرى بايلانىس ارنالارىن قۇرۋعا مۇمكىندىك بەرمەك.